Ҫу уйăхĕн 22-мĕшĕнче Мăн Шетмĕри вăтам шкулта Николай Петрович Петровăн 60 ҫулхи юбилейне халалланă пултурулăх каҫĕ иртрĕ. Шел пулин те, ҫыравҫă хăй пирĕнтен виҫĕ ҫул каялла чире пула уйрăлса кайрĕ. Тĕл пулăва унăн тăванĕсем: Петров Василий Петрович шăллĕ Лиза ятлă хĕрĕпе,  Петрова Надежда Петровна йăмăкĕ, Нестер Янкас пĕрлешĕвĕнчен Георгий Тусли, Николай Ершов, Виталий Михайлов, Владимир Константинов ҫыравҫăсемпе тавра ен тĕпчевҫĕсем, районти тĕп библиотекăн аслă библиотекарĕ Гурьева Светлана Аверкиевна, Мăн Шетмĕ ветеранĕсен канашне ертсе пыракан Ильин Иван Ильич хапăл тусах хутшăнчĕҫ. Ҫак шкулта вĕренекен Сергеев Святослав (7 класс), Яковлева Алла (5 класс), Трак шкулĕн 1-мĕш классĕнче вĕренекен Петрова Елизавета Николай Петров сăввисене вуларĕҫ. Михайлов В. М. район шкулĕсенче вĕренекенсем Н.Петров сăввисене вуланă конкурс видиоматериалĕпе паллаштарче, унăн сăввисенче тапратнă темăсем тăрăх тишкерÿ турĕ. Светлана Аверкиевна пухăннисене ҫыравҫă пурнăҫĕпе пултаруллăхĕ ҫинчен хатĕрленĕ презентацине кăтартрĕ. Хăнасем Н.Петров сăввисене вуларĕҫ, аса-илÿсемпе паллаштарчĕҫ. Юбилĕй каҫĕ вĕренекенсемшĕн питĕ усăллă пулчĕ.